ORANJESTAD(AAN): Diahuebs a tristo noticia a yega Aruba, cu un yiu di tera cu hopi talento cu tabata tene nomber di Aruba na halto internacionalmente, a fayece.Ta trata di e diseñador Percy Irausquin, naci na 1969.For di Hulanda e noticia a drenta cu Percy a worde haya morto den baño di su cas na Amsterdam, den oranan di atardi ora Hulandes.Te ainda e informacion ta indica cu aparentemente Percy a slip cay den baño y e golpi na su cabez a causa su morto.Tabata su amigo Arjan Mallie, kende hunto cu polis a haye den su cas. Segun informenan di Hulanda, Mallie a tuma contacto cu polis, ora cu pa 1 dia y mey e no a logra haya contacto cu Percy.Pesey hunto cu polis el a bay na e cas y el a topa cu curpa sin bida di Percy den baño.Un autopsia lo determina exactamente motibo di fayecimento di e diseñador Arubiano hopi talentoso di 39 aña.Percy a crece cu 5 ruman muher, pues moda semper tabata un item grandi na cas. Despues di a traha 2 aña den un boutique, Percy tabata tin placa suficiente pa bay Hulanda y eynan el a cuminza cu carera di moda cu un curso di moda na Breda.
Despues el a atende academia renombra di Rietveld na Amsterdam, despues di cual el a studia "Fashion Design" na instituto di moda di Arnhem. Buscando experiencia, inspiracion y competencia Percy a bay Paris y Eynan el a siña hopi di Hubert Barrère, e diseñador di Dior y Yves Saint Laurent.Pa alguntempo el a traha na e cas di moda di Cristian Lacroix.E prome coleccion di Percy na 2001, yama "Inspiration Amoureuse" ta inspira pa su 5 rumannan. Cu e liña Haute Couture aki el a gana tanto e Robijn Fashion Award como tambe e premio Frans Molenaar.
Su di dos coleccion na 2002 "Bacchanal Chique", tabata pasa ariba e colornan y zonidonan di e carnaval di Aruba. Esaki tabata pareu cu su coleccion final di studio na Fashion Institute Arnhem.Na 2003 Percy a presenta "Edmee Enbias", un coleccion cu a worde yama pa su wela Edmee di semper tabata su fuente di inspiracion pe.Enbias ta e nomber di un technico cu a bira un marca renombra pa e pañanan di Percy.
Na 2004 Percy a presenta pa prome biaha un "pret-a-porter" coleccion bao e nomber "Hiver Palm Beach". Tur aña Percy ta presenta un coleccion fantastico cu nombernan asombroso manera "All dress up and nowhere to go", "Belle du jour" y "Supernova"."Supernova" tabata su ultimo coleccion na 2006. Percy ariba corto tempo a crece bira un di e diseñadornan mas prometedor di e tempo aki. Su coleccionnan mientrastanto no solamente por worde mira na Hulanda solamente, sino tambe na New York.E aña aki tambe el a habri su propio boutique na Amsterdam den Cornelis Schuystraat.
Aunque cu Percy ta un hende hopi modesto, su pañanan no ta.Su pañanan ta special diseña pa e un muher desaroyador y pa e demostra su apariencia sexy. Percy kier laga e muhernan sinti cu nan ta muher. Su mensahe semper ta: "Always overdress, no matter what the occasion...."Un di e logronan grandi di Percy tambe tabata cu un directora di cine nomina pa Oscar, a bisti un di e shimisnan diseña pa Percy durante e anochi special di Oscars.
Ta trata di Suzie Templeton, kende despues di ta nomina pa mihor cine di animacion, a cana riba Red Carpet di Oscars cu e bisti cu Percy a diseña.Diferente actriz Hulandes tambe tabata cliente di e talentoso Arubiano, entre otro Katja Schuurman, Bridget Maasland, Carice van Houten y Leontien Borsato.No mucho tempo pasa Percy a presenta su tremendo coleccion pa 2009 durante e asina yama Amsterdam International Fashion Week.
TrackBack URI for this entry
| < Prev | Next > |
|---|
