ORANJESTAD (AAN): Siman pasa, DIARIO a bin cu e informe relaciona cu un testigo clave, cu na final di 2007 a dicidi na bin dilanti pa asina revela tur loke el a mira na Mei 2005 na su cas, cu ta keda den area pabao di Veld di Nacional, cerca di Dam di Monserat.E testigo clave sinembargo tabatin miedo di revela tur cos cerca Polis y Fiscal di Aruba, pasobra den pueblo tabatin e pensamento cu nepotismo den Ministerio Publico ta bibo y creciendo.El a duna declaracion na Ministerio Publico si, pero te na cierto punto. Algo importante el a laga atras, y esey el a divulga solamente cerca investigadornan Mericano.E Mericanonan a scucha su storia, y inmediatamente a sinti cu e testigo masculino aki di distrito di Noord, ta papiando berdad. Pero pa por tin indicacion cu e ta revelando algo corecto aki... y cu e testigo no ta inventando un storia, nan a puntre si e ta dispuesto pa viaha pa Merca, y haci un asina yama "lie detector test", conoci oficialmente como un "Test Polygrafico".
Recien el a viaha pa Merca, unda el a haci e test aki cerca e conocido John S. Swartz, un profesional cu ta hopi bon den examinacion di polygraph.
A keda proba cu e testigo Arubiano aki ta papiando berdad! Asina posiblemente e ta treciendo claridad tan spera den e caso di desaparicion di Natalee Holloway na Mei 2005 na Aruba.Siman pasa, porfin despues di tabata sigui e acontecimento nobo aki di e testigo pa varios luna caba, DIARIO a presenta e prome parti di e declaracion di e testigo aki. Esey tabata e prome parti cu tabata den poder caba di Fiscal mr. Mos na Aruba.
DIARIO a opta pa warda cu divulgacion di e segundo parti, pa asina duna FBI na Washington, suficiente oportunidad pa nan manda e resultado di e Polygraph Test y e Declaracion aki pa Hulanda. Aki e pensamento ta cu Hulanda lo a manda copia directo pa Aruba.E biaha aki, e declaracion ta aparece completo den DIARIO, y e traduccion liber di Ingles pa Papiamento a worde haci door di Redaccion.
LOKE TESTIGOA DECLARA
Tabata e anochi di 30 di Mei 2005, cu e tabata drumi den camber na cas, ora cu el a spierta debi na cantidad di cacho cu tabata blaf for di control, y riba un tono hopi alarmante.E testigo a habri wowo, bira wak holoshi y mira cu ta 4:05 a.m.Scuchando e direccion di blafmento, el a bay di biaha den sala di su cas y observa kico e cachonan tabata blaf asina tanto y cu urgencia.Bao di un palo di luz di caya, el a mira un persona ta cana den direccion di su cas. E tabata bin for di direccion di Veld di Nacional cerca di e Dam di Monserat, bayendo pabao direccion di Hotelnan.E persona na pia a pasa bao di e siguiente luz di caya, y e testigo a mira e persona aki bon y claramente. E tabata un persona notablemente halto, delega, masculino, color di cuero cla, cabey scur cortico, un persona relativamente hoben y esaki tabata parce di ta un Hulandes.
Tambe el a wak e forma (profil) di cabez y un banda di su cara.E paña cu e tabatin bisti ta un flanel color cora y un carson largo color cla.Riparable ta cu e persona aki tabata cana ta cu un banda di pia ta ‘limp', y aki e testigo a mira cu e tabata falta un pia di zapato of keds. E ta calcula cu na e forma cu e tabata cana di banda, e tabata falta su zapato of keds di su pia drechi.Algo cu el a nota tambe, ta cu e persona riba caya tabata hala rosea extremadamente hopi pisa como sifuera e tabata core duro pa basta rato. Su pecho tabata subi-baha masha rapido mes.
PAÑA TABATA MUHA TAMBE
E testigo a sigui declara (y proba via Lie-Test cu e ta papiando berdad), cu e persona riba caya tabatin paña muha, y e tabatin un strepi hopi notable di awa di lodo cu tabata yega te riba su pecho, como 5 centimeter riba su pecho, mas o menor riba su flanel.E strepi riba su flanel tabata mustra claramente, y di e strepi di awa di lodo bin abao e tabata completamente muha.Prome e testigo a pensa cu e persona aki a caba di bringa, y a sali core pa e no haya mas golpi. E banda di su cara cu e testigo por a mira, tabata mustra sinembargo di ta liber di golpi of sanger.Pero debi cu e persona aki no a wak ningun rato mes su tras, pa check si acaso tin hende ta siguie, y ta sigui cana cabez abao y cu un velocidad basta acelera, e testigo a pensa cu ta otro cos e a haci pero no bringamento.
E persona a sigui pasa dilanti su cas, y sigui cana bay, te ora cu el a perde for di bista, y ningun rato e persona aki a wak na halto of mira atras, y a sigui cana den direccion di Hotelnan.Tur e cos aki a pasa den un tempo di como 1 minuut.
INFORME NOBO DUNA
Despues cu e testigo a perde e persona aki di bista, e testigo a keda sinta den sala pa 5 minuut.E ora diripiente e testigo a observa un vehiculo coriendo poco-poco mes ta bin for di direccion di Hotelnan bayendo pariba. Na stuur tabatin un homber di edad medio color blanco.Banda di dje sinta, por a mira e mesun homber hoben den e vehiculo.E testigo aki a mustra, cu e homber color blanco tabata manehando e vehiculo, un estilo di jeep color cora, masha poco-poco mes riba e caya.Aki e testigo a revela na e Mericanonan, cu tabata claramente visible cu e chofer, y tambe e pasahero sinta na banda ta parce di ta wak pafor enbusca di algo benta abao.Asina e jeep color cora aki a sigui bay pariba den direccion di Dam di Monserat.
EL A RECONOCE E CHOFER
Segun e testigo, dentro di un siman despues di esey, el a reconoce e homber hoben como Joran van der Sloot, ora cu e potret di e hoben a cuminza sali tur caminda den prensa, y cu e desaparicion di Natalee Holloway a bira un sensacion mundial.Despues e testigo a reconoce e homber coriendo e jeep cora, como e tata di Joran van der Sloot, esta Paulus.Te akinan e testigo por a duna declaracion, pasobra e resto di madruga ey nada mas a socede.E pregunta di hopi hende ta: Kico Paulus y Joran tabata core poco-poco ta busca banda di e caminda cu ta bay pariba y finaliza banda di Dam di Monserat? E solo hecho cu e test polygrafico a demostra cu e testigo "is telling the truth", ta suficiente motibo pa enfoca tur atencion aki.
Tog un biaha mas, tin hopi lector cu kier sa di con e testigo no a bay dilanti mesora na aña 2005?Manera DIARIO a divulga caba siman pasa, ora cu el a tende cu e tata di Joran ta abogado y studiando pa bira Huez, y cu e ta amigo intimo di Hefe Halto di Polis, etc., esaki a caba di descurashe totalmente. E lo no sinti su mes safe si e bay dilanti e ora como testigo.Pa colmo, sabiendo cu e sistema huridico hudicial di Aruba ta totalmente den man di Hulandes, el a haye forza na keda keto. Esaki a dura como 2 aña y pico, te na final di 2007 ora cu porfin el a cuminza sinti cu e tin di revela loke el a mira, y asina a cuminza sali poco-poco dilanti, pa splica kico el a mira na su cas, cu ta keda como 500 meter leu for di e Dam di Monserat na Noord.
E testigo aki a haya abogado tambe pa por defende, pasobra e caso grandi aki ta implica automaticamente cu hasta testigonan tin di ta bon prepara pa haya defensa hudicial, y tambe conseho.
Mientras tanto, e Mericanonan cu permiso di Polis, a haci un test di sonar na Dam di Monserat y esey a socede na comienzo di e aña aki, ora cu e nivel di awa tabata basta abao eyden. DIARIO a haya sa, cu e test aki, a señala cu e sonar a descubri "15 obheto" den suelo, y cu nan por a defini solamente 3 di nan.
E test di polygrafo ta un machine cu ta detecta diferente cambio den e curpa di un ser humano, e.o. presion di sanger, pulso, respiracion, y conductividad di cuero, mientras cu e testigo ta worde puntra varios pregunta, riba e teoria cu contestanan falso lo produci diferente midimento. E polygrafo ta midi cambionan psicologico causa pa e sistema nervioso durante sesion di pregunta.E testigo Arubiano di 48 aña di edad, a pasa e test aki exitosamente, indicando cu tur loke el a mira e madruga ey pabao di Dam di Monserat, ta berdad.DIARIO ta supone cu Ministerio Publico di Aruba a haya e relato aki caba via di Hulanda, door di FBI Washington. Si acaso esey no ta asina, awe nan ta mire gratis den DIARIO, y nan por cuminza haci nan huiswerk.
TrackBack URI for this entry
| < Prev | Next > |
|---|
